O heert, ihr liewe Leit, was sin des Zeite;
Dass unser eens noch dess erlewe muss!
’N jeder Baurebuh muss Kärridsch reide,
Un Baure-Mäd, die schleppe rum in Seide,
Un Niemand nemmt an all dem Schtolz Verdruss.
’N eegne Boghie hot ’n jeder Baurebuh,
’N schpreier Gaul un G’scherr mit Silwerb’shlege druf,
Un plenti Zehrgeld ah im Sack, — do is kee’ Ruh,
Am Samschdag gehn die Dschent’lleit ’m Schtedt’l zu
Un schtelle dort am deirschte Wertshaus uf.
Wie is des junge Baurevolk doch ufgedresst,
Wie heewe se die Kepp so schteif un hoch!
Wie dhun se in die schtolze Fäsch’ns renne,
M’r kann se nimme vun de Schtadtleit kenne,
Sie mache all ihr Hochmuths-Wege nooch.
D’er Vatter denkt: Was hab ich schmärte Sehne,
Die Mutter sagt: Mei Mäd die kumme raus!
So Schteil koscht Geld. Ja well, m’r kann jo lehne.
Sell geht ’n Weil, bass uf, du werscht’s ball sehne,
Der Vatter „geht d’r Bungert Fens ball ’naus.”
Vor Alters war es als en Sinn un Schand,
Meh’ Schulde mache as m’r zahle kann;
’Sis net meh so: m’r gebt juscht Notis dorch die Editors
M’r het geclos’t, un dhet cumpaunde mit de Creditors,
Wer so betriegt, der is en Dschent’lmann.
Wie lebt m’r nau? Ich sehn du weescht noch nix!
M’r lebt juscht wie d’rvor: des fixt die Lah!
M’r eegent nix — die Fraa hot’s all in Hand —
M’r is ihr Edschent, mänedscht Geld un Land
Un geht nau in die Koscht bei seiner Fraa!