Die mir in dem winter froͤide hant benomen·
si heissen wib si heissen man· disú svmerzit·
dú mv̊s in bas bekomen·
ǒwe dc ich niht vlůchen kan·
leider ich en kan niht mere
wan dc verbel wort vnselig· neina dc were al zesere·
Zwen herzekliche fluͤche kan ich ǒch·
die flůchent nach den willen min·
hv́re mvͤzens beide esel vnd den gǒch·
hoͤren ê si enbissen sin·
we im danne den vil armen·
wesse ich ob sis noh gerúwe·
ich wolde mich dvr got erbarmen·
Herren vnd frúnt nv helfent an der zit·
dc ist ein ende es ist also·
ich enbúte ú minen minneklichen strit·
ia enwirde ich niemer rehte vro·
mines herzen tiefiv wunde dú mv̊s iemer offen stan·
es enkv́sse 142v mich mit frúndes mvnde·
mins herzen tiefú wunde dú mv̊s iemer offen·
si enheile es vf vnde vz von grunde·
mins herzen tiefú wunde· div mv̊s iemer offen sten·
sine werde heil von hiltegvnde·