Die grisen wolten mich des wider striten·
dv́ welt gestvͤnde trvreklicher nie·
vnd hete an froͤiden ab genomen·
doch streit ich zornliche wider sie·
si mohtens wol gedagen
es wirt niemer wâr·
mir was ir rede swâr·
svs streit ich mit den alten·
die hant den strit behalten·
nv wol lenger denne ein iar·
Min ǒge michel wnder siht·
die es vil wirs verdienen kvnnen denne ich·
das dien so schoͤne heil geschiht·
ǒwe welt wie kvmt es vmbe dich·
ist got selch ebenere·
er git dem einen gewin·
dem andern sin·
so wene ich alse mere·
ein richer tore were·
so rich als ich armer bin·
Hie vor do wir alle waren vro·
do wolte nieman hoͤren mine klage·
nv ist svmelichen so·
das si mir wol gelǒben fur ich in sage·
nv mvͤze got erwenden v́nser arbeit·
vnd gebe v́ns selikeit·
das wir die sorge swenden·
ǒwe moͤhte ich verenden·
ich han ein svnder leit·