Dest ein not das mich ein man·
vor al der werlte twinget swes er wil·
sol ich des ich niht enkan·
beginnen dc ist mir ein sweres spil·
ich hat ie vil steten mv̊t·
nv mv̊s ich leben als ein wib dv́ minnet vnd das angestlichen tůt·
Der min hůte des were zit·
ê dc ich iht getête wider in·
wolt er lâssen nv den strit·
wes gert er mêre wan dc ich im hoͤlder bin·
danne in al der werlte ein wib·
nv wil er das ist mir ein not dc ich dvrh in die ere wâge vnd ǒch den lib·
Des er mich nv niht erlât·
dc tv̊n ich vnd tete sin gerne vil·
wand es mir vmb in so stât·
dc ich sin niht ze frúnde enbern wil·
ein also schone redender man·
wie moͤhte ein wib dem iht versagen· der ǒch so tvgentliche lebt als er wol kan·
Schone kan er im die stat·
gefuͤgen das er sprichet wider mich·
zeinen ziten er mich bât·
dc ich sinen dienest nême dc tet ich·
do wânde ich des ich tete wol·
done wîste ich niht dc sich da hv̊b ein swere dú lange an minem libe wesen sol·
Mines todes wande ich bas·
danne das er gewaltig iemer wurde min·
we warvmbe spriche ich dc·
ia zúrne ich ane not es solte eht sin·
dike hat ich im versaget·
do tet er als ein selig man der sinen kvmber alles vf genade klaget·