Der walt vnd dú heide breit·
die stent lobelich gekleit·
ellú herzen erstoͤret sint·
des froͤit sich megde vnd stolze kint·
ende hat der kalte wint·
Ich wil min truren lan·
sprach eine maget dvr einen man·
der mir kom in minen sin·
nv weis er dc ich im wege bin·
ich wil mit im vil tǒgen hin·
Dú mv̊ter vor zorne sprach·
we dc ich dich ie gesach·
war hast dv dich angeleit·
din har mit rosen wol bekleit·
dv wirdest niemer eltiv meit·
So werde aber altes wib·
mv̊ter ich mv̊s sinen lib·
minnen schiere oder ich bin tot·
ich wil mit im nach rosen rot·
...
Tohter wer mag es sin·
ein waleis liebú mv̊ter min·
liebes kint dc ist ein man·
der senide sorge wenden kan·
Lon ime dc ist wol getan·