Der meie der ist riche·
wan er fuͤret sicherliche·
den walt an siner hende·
der st nv núwes lǒbes vol der winter hat ein ende·
Ich froͤwe mich gegen der heide·
der liehten ǒgenweide·
dú vns beginnet nahen
also sprach ein wolgetaniv maget den wil ich schone enpfahen·
Mv̊ter ich wil selbe·
mit richer schar zevelde·
vnd wil den reien springen·
da ich dú kint núlich horte singen·
Neina tohter neine·
ia han ich alters eine·
dich gezogen an minen brusten·
dv la dich des niht gelusten·
Den ich iv wil nennen·
den mvget ir wol erkennen·
zv̊ dem ich wil gahen·
der ist genant von rúwental· den wil ich vmbe vahen·