Der lange ſvͤſſe kvmber min
nach miner h̾zeliebē frowē derſt ernúwet·
wie moͤhte ein wūder groͤſſer ſin·
dc min v̾loꝛner dienſt mich ſo ſeltē rúwet·
vn̄ ich doch nie den bottē geſach·
der mir nie bꝛehte troſt von ir wan leit vn̄ vngemach·
wie ſol ich iemer diſe vnſelde erwendē·
vnmere ich ir das iſt mir leit
ſi wart mir nie ſo lieb kvnde ichs v̾enden·
Wa nv getrúwer frúndes rat·
was tůn ich das mir liebet dc mir leidē ſolte·
min dieneſt ſpot erwoꝛben hat·
vn̄ anderſ niht wan ob ichs noch gelǒben wolte·
io wēne ich es nv gelǒben mv̊s·
des wirt ǒch niemer leides mir vnz an min ende bůs·
ſit ſi mich haſſet die ich von h̾zen mīne·
mir kvndeſ niemā geſagen
nv bin ich ſin vil vnſanfte woꝛden inne·
Das ſi mich als vnw̾den habe·
als ſi mir voꝛ gebaret das gelǒbe ich niemer·
nv laſſe ein teil ir zoꝛnes abe·
wan endelichē ir genade bitte ich iemer·
vō ir enmac ich noch enſol·
ſo ſich genůge ir liebeſ froͤwēt ſo iſt mir mit leide wol·
da enkan ich and̾s niht vō ir gewinnē·
ê· das ich ane ir hulde ſi
ſo wil ich ir gvͤte vn̄ ir geb̾de mīnen·
Owe das alle die nv lebent·
ſo rehte haben befundē wie mir iſt nach einē wibe·
vn̄ das ſi mir den rat niht gebent·
dc ich getroͤſtet wurde noch bi lebendē libe·
io klage ich niht min vngemach·
wā das den vngetrúwen ie bas danne mir geſchach·
Die nie gewunnē leit vō ſenend̾ ſwere·
wolte got erkanden gvͤte wib ir ſvmelich̾ werben wie dem were·
Ein rede der lúte tůt mir we·
da enkan ich niht gedulteklichē zv̊ gebarē·
nv tůnt ſiſ alle deſte me·
ſi fragēt mich ze vil vō miner frowē iaren·
vn̄ ſpꝛechēt welher tage ſi ſi·
dvr dc ich ir ſo lange bin geweſen mit trúwē bi·
ſi ſpꝛechēt dc es moͤhte mich v̾dꝛieſſen·
nv la dc aller beſte wib ir zuhteloſer vꝛage mich genieſſen·
101v Mac ſi mich doh laſſen ſehē·
ob ich ir were lieb wie ſi mich haben wolde·
ſit mir niht anders mac geſchehē·
ſo tv̊ geliche deme als es doch weſen ſolde·
vn̄ lege mich ir wol nahen bi·
vn̄ biete es eine wile als es vō h̾zen ſi·
gevalle es danne vns beidē ſo ſi ſtête·
v̾lieſe aber ich ir hulde da ſo ſi v̾boꝛgē als obe ſis nie getête·