O kennscht du den wieschte, den gaschtige Mann?
Hu! — derf m’r den Kerl e Mensch heese?
Ja, dass er en Mensch is mag glaawe wer kann,
Er gukt mir zu viel wie der Beese!
Seh juscht ’mol sei’ Aage, sei Naas — alle Welt! —
Er dhut ’s Maul uf un zu wie die Scheere;
’N Schwanz wie ’n Ochs, ja, des hot er, gelt?
Un en horiger Belz wie die Bäre.
Kummt der in dei’ Haus, dann gebt’s Lärme genunk,
Er sucht die nixnutzige Kinder!
Un find ’r eens, geht er uf eemol zum Punkt,
Un dengelt gar bumm’risch die Sinder.
Er schtellt sich do hi’ mit d’r forchtbare Rudh,
Un brummelt sei’ drohende Rede;
Do werre die Kinner uf eemol arch gut
Un fange recht heftig a’ bete!
War eens — wie’s manchmol der Fall is — recht knitz;
Wollt d’ klee’ Fitz der Mutter verschpettle:
Ich wett, es lacht net for d’r Belsnickelfitz —
Es dhut um gut Wetter gschwind bettle.
Nau schittelt d’r Belsnickel grausam sei’ Sack,
Raus falle die Kuche un Keschte;
Wer gut is, kann lese, — wer schlecht is, den — whack! —
Den schmiert ’r mit Fitzeel zum Beschte.
Vum Belsnickel hab ich nau ebbes gelernt,
Des wer’ ich ah nie net vergesse:
Nooch dem dass mer se’t werd eem ah in der Aernt
Die Frucht vun seim Werk ausgemesse.