Ane lieb so manig leit·
we wer moͤhte dc erliden iemer me·
wer es niht vnhouescheit·
so wolt ich schrien se gelúke se·
gelúke dc enhoͤret niht·
vnd selten ieman gerne siht·
swer trúwe hat·
ist es also wie sol min danne imer werden rat·
We wie iamerlich gewin·
tegelich vor minen ǒgen vert·
dc ich so gar ertoret bin·
mit miner zvht· vnd mir dc nieman wert·
mit den getrúwen alten sitten·
ist man nv ze der welte versnitten·
ere vnd gv̊t·
hat nv lútzel ieman wan der úbel tůt·
Das die man als úbel tůnt·
dast gar der wibe schult dest leider so·
hie vor do ir mv̊t vf ere stůnt·
do was dv́ welt vf ir genade fro·
hei wie wol man in do sprach·
do man die fůge an in gesach·
nv siht man wol·
dc man ir minne mit vnfůge erwerben sol·
Lat mich zv̊ den frowen gan·
so ist dc min aller meiste klage·
so ich iemere zv́hte han·
so ich îe minre werdekeit beiage·
si swachent wol gezogenen lip·
es ensi ein wolbescheiden wib·
der meine ich niht·
dú schamt sich des swa iemer wibes scham geschiht·
Reinú wib vnd gůte man·
swc der lebe 128r die mvͤssen selig sin·
swc ich den gedienen kan·
dc tv̊n ich das si gedenken min·
hie mit so kv́nde ich in das·
dv́ werlt enste danne schiere bas·
so wil ich leben·
so ich beste mac vnd minen sanc vf geben·