Oppida commissi verum dum marchio regni
Permeat, illecebras explens pompose caducas,
Ecce repentino turbantur gaudia casu.
Dum raptis etenim conjunx regalis abuti
Audet relliquiis, spirans typho impietatis;
Vindex ira subit, satan per viscera gannit:
Quem coluit petulans, hujus sit hospita bacchans.
Talibus attonitis accessit regia nutrix
Anne patent, inquit, veteris commissa piacli?
Extera Wilfridum violant ergastula justum:
133.1002B| At tua terrifico quatiuntur daemone membra.
Sprevisti emeritas Petri de culmine chartas:
Excipis en dignas irato judice poenas.
Capsaces [phylacteria] collo demsisti immunda verendo:
Nunc moribunda Baal vinciris et ipsa veruto.
Naribus immanes ceu fundens torridus ignes,
Rex aderat, quem sic genitrix affatur honesta:
Jam memor esto tui, loetargum subrue, fili,
Ultio dilectam profligat summa jugalem.
Sed tu sceptrigeram si vis augescere dextram,
Vincula solve viri, quoquam sine crimine nexi:
Et si fers animo, jubeas discedere regno.
Annuit invitus, patuit mox carcer apertus,
Reddidit et claram nubes densissima stellam.
133.1002C| Protinus immeritam sensit regina medelam.