Rumor tunc prodit, quia bello plura cruento
Agmina corruerant alterna caede vorata:
Ekfridusque feri percussus cuspide Picti,
Exsilio sanctos desivit trudere pravo.
Praeterea pastor Dorobernica claustra gubernans
Theodorus, damnare nefas in praesule quondam
133.1004A| Commissum cupiens, jamjam vergente senecta
Expetiit revocare virum sat inepte repulsum.
Ergo redit humilis, implens exacta prioris.
Hos inter praesul Erchenwaldus venerandus.
Accedunt terni verae funabula lucis,
Exorsusque dehinc senior Theodorus infit:
Poenitet en, Fili, quia tot tormenta subisti.
Ultima porro meae properant confinia vitae:
Tu quocunque modo deliqui, quaeso, remitte.
Terruerant animum Wilfridi gesta beatum.
Tum coelis oculos attollens, brachia terris,
Indulsit facinus, sicut praecepit Iesus.
Ergo solo strati, poscunt miseramina Christi.
Inque vicem culpis perfecto corde remissis,
Gaudebant lacrymis sobria de fronte profusis.