Cujus quemque rogo meminisse legentem
Hoc opus, orando Dominum pietatis amore
Ut scelerum veniam fidens mereatur ab illo,
Qui non vult quemquam peccati morte perire:
Sed magis ut rediens vivat virtutibus almis.
(0414D)His quoque patratis summae celebratio missae
Laudibus intonuit dignis: qua rite peracta
Lassi cum sociis, multa crepitante caterva,
Haistolf atque Eigil ducti sub tecta recurrunt
Moenibus en altis praesul convivia laetus
Pastor et ipse simul: utrorumque inde minores
Mox adeunt, Patris celeres tum forte ministri
Dona ferunt Cereris multo sudore canistris.
Quaesita ast alii vario nidore respersas
Instant ferre dapes; alii namque inclyta vitro
Ordine composito miscebant pocula Bacchi.
(0415A)Nec minus intererat epulis simul alma paternis
Lectio: namque cibus fortis solidusque virorum,
Intentos satians superi pinguedine verbi.