Haec ubi dicta essent, verrat fraterna potestas
Fratres ac socios proprio de corpore lectos,
Qui cum Patre simul noviter seniore recepto
Regis ad eximii super hoc decreta recurrant.
His quoque compositis pergunt, comitatur Aaron
Primus ab his, misit solers quos regia cura
Ad nostrum commune bonum sub tempore, quo nos
Improbus atque minax demum furialibus ausis
Monoceros jam cessavit terrere fugaces.
Solibus hinc etiam nonnullis rite relectis,
(0408A)Venit ad occidua haec eadem legatio rura,
Caesaris antiqui supplex oracula poscens.
Tum namque occiduus monachus et presbyter alti
Regis ad adspectum prior invitatus Aaron
Progreditur, causasque vitae fratresque venisse
Fuldenses, humili coram sermone patenter
Rege aperit, atque ante fores adstare reclusis
Quos cum pro foribus Caesar praesensit, ut intrent
Dicitur. At senior fratrum stipante caterva
Intrans procidit ad genua, genibusque volutans
Una cum sociis, vultum regnantis honorat.
Nec mora continuo, dextra innuit ipse nitenti,
Atque astare jubet: prior et sic incipit ipse.
O nati, fratresque mei, lectique parentes,
Spes patriae, nostrique decus et gloria regni,
(0408B)Vos horrenda nimis ante discrimina pestis
Lethiferae urgebant: saltim nunc eruta corda
Erigite, moestumque metum secludite: vestra
Regula quod doceat, intento corde tenete.
Ipsa est porta atque arcta via, quae ducit ad alta
Regna poli; contendite nunc intrare per illam!
Ut per eam modo currentes, veniatis ad illum
Qui vos de tenebris miserans et carcere caeco,
Non meritis, produxit in admirabile lumen.
Currite nunc, fratres, vitae dum lumen habetis,
Neu tenebrae vos praeripiant. Ante omnia pacem,
Veram pacem, inquam, sine qua nec munus ad altar
Proficit allatum, (neque enim possessio quemquam
Pauperibus profusa juvat, nec martyr ab alto
Judice dona tulit unquam) servate, monebo.
(0408C)Haec dicens aliaque simul longo ordine multa,
Quem vobis optastis, ait, producite Patrem
Fratres, Canitie subito conspersus Eigil
Pergitur in medium, constanti mente vetustus.
Regis ad imperium propius processerat ultra.
Progrediens, quem ut conspexit, rex arduus infit:
Istene pastor adest, quem omnis concordia fratrum
Concors provehit, atque probat uno ore canoro? at
Regis suppliciter pauca legatio fratrum,
Iste est, o bone rex, nunc inclinata recumbit
In te summa eadem: tantum decerne tenendum, o
Spes nostra nostraeque decus et gloria vitae.