(0387B)
Curriculi genus est, memorat quod Gallia rhedam,
Molliter incedens orbita sulcat humum.
Exsiliens duplici bijugo volat axe citato,
Atque movet rapidas juncta quadriga rotas.
Huc ego dum famulans comitatu jungor eodem,
Et mea membra cito dum veherentur equo,
Pontificisque sacri Bertichramni actus honore,
Comprehendente manu raptus in axe levor.
Qualiter implumes fetus pia mater hirundo
Confovet, et placide pennula tensa regit;
Sic bonitate potens, affectu dives opimo,
In proprium pastor molle sedile locat.
(0387C)Nec solum amplectens pia mens, sed diligit omnes,
Unde magis populis unicus exstet amor.