«Haec igitur, Burnelle, tibi quae vidimus ipsi
«Diximus, exemplis ut docearis ab his.
«Sufficiat quod habes; quoniam, si vera fatemur,
«Stulta petis, salvo semper honore tuo.
«Nec tamen id fieri quovis medicamine posse
600«Credideris; nihil est; stultus es; ito domum.
«Si quot habent medici spatiosi climata mundi
«Haec tibi jurassent, nil nisi verba forent.
«Non tamen id renuo quin possit crescere multum
«Haec tua cauda tibi, sed nova nulla dari.
«Fracta vel elisa medicorum cura reformat,
«Funditus abscisa sic remanere solent.
«Mortua cum vivis nulla ratione cohaerent,
«Caesa nec abscisa cura juvare potest.
«Unde satis longa poterit tua crescere cauda,
610«Dummodo cum reliqua foedera carne tenet.
«Et tamen in curis et sumptibus enumerandis,
«Ut decet et debet, copia larga subest.
«Ardua praegnantem poscunt medicamina bursam,
«Res et opes magnas vulnera magna volunt.