Talia dicenti subito de nare sinistra
3460Frigidus erupit sanguis, et ipse brevis.
Quo statim viso dixit Burnellus: «Iniquum
«Portendunt aliquid talia signa mihi.
«Olim, nocte prius quam caudam mane molossi
«Surripuere meam, contigit illud idem.
«Prospera det Dominus mihi nunc et ab omine duro
«Eruat! inque bonum sit cruor iste, precor!
«Omine mane suo currens lepus et capra clauda
«Obvia sint illis, qui mala nostra volunt!
«Noctua prima precor sit avis quae mane sereno
3470«Exeat, occurrens hostibus atra meis!
«Obvia nens veniat lanam de vellere nigro,
«Deque colo taxi femina nuda pedes!
«Mane senex calvus et vespere crine soluto
«Hostis in occursum curva feratur anus.
«Obvius occurrat utriusque coloris eisdem
«Obstipo monachus vertice, voce carens.
«Pauperis aut viduae veniens de funere tristi
«Presbyter iratus ipse salutet eos.
«Ad laevam bufo transversus corpore toto
3480«His prior occurrat et ferat ipse pedem.
«Quique solet dici pestisque nocentior esse
«Rusticus occurrat hostibus ipse meis.»