«Praemonstratenses rursus qui vestibus albis
«Induti veniunt simplicitate placent.
«His color unus adest niveo candore refulgens,
2290«Hos semper simplex vestis ovina tegit.
«Omnibus abjectis duris pro mollibus uti
«Vestibus ad praesens hoc statuere modo.
«Vellere partito, quod colli nuda tegebat,
«In proprios usus constituere suos.
«Ne caro luxuriet, vervecis vellere crispo
«Corpora castigant asperitate gravi.
«Damna tamen lini, lana redimente suavi,
«Ordine cogente sustinuisse decet.
«Ordinis austerus rigor est, quia carnibus uti
2300«Hos in conventu tempus in omne vetat.
«Dispensando tamen sacer ordo salubribus usus
«Consiliis super his alleviavit onus,
«Pinguia concedens quae sunt affinia carni,
«Sic tamen ut nunquam sit manifesta caro.
«Bellum cum carne, pacem cum pinguibus esse,
«Pacis amatores hoc statuere modo,
«Carnis honestatem sic conservare volentes,
«Ne contra carnem lex inhonesta foret.
«Si foret exclusa penitus caro, carnis honestas
2310«Laesam se posset de ratione queri.
«Si foret in totum sine conditione recepta,
«Saepe daret causam materiamque mali.
«Unde nec admissa penitus nec tota repulsa
«Exulat, in patria menstrua facta sua.