Specimen Latinorum carminum — In Nativitate B. Mariae Virginis

Aligeri ad cunas Dominae sua munera portant,
Sidera hic ex auro, hic lilia, at ille rosas;
Pallentes alius violas, aliusque amaranthos:
Neve deest indi gemma corusca maris.
Ast unus trepide accedens sua dona sub alis
Condit: septenos nempe gerit gladios.
Sed tandem profert; namque haec divina voluntas;
Ac dubia tendit dextera, et illacrymat.
Dona Puella capit subridens: sidera, flores,
Gemmas dat capiti; colligit arma sinu.