Vita brevis hominum, sed non brevis illa piorum,
Dum migrante die prosperiora tenent.
88.0165B| Qui meruere magis de carcere carnis euntes,
Post tenebras mundi, luce perenne frui.
Ex quibus hic recubans meritis Praesidius almis,
Carne tenet tumulum, spiritus igne polum.
Pectore de proprio Christi responsa rigando,
Multorum exstinxit fonte fluente sitim.
Invitans instanter oves ad pascua Regis,
Distribuit dulcem fratribus ore salem.
Nam quoties monachus peccati est vulnere fixus,
Missus ad artificem certa medela fuit.
Ibat ad abbatem famulans, sanctumque magistrum,
Discipulus humilis, qui fuit ante tumens.
Talibus officiis intentus amore Tonantis,
Inter et Angelicos fulget honore choros.