M. Heu stirpem inuisam et fatis contraria nostris!
Huc ades, o formose puer. qui spiritus illi!
Sic oculos, sic ille manus, sic ora ferebat!
Perfidus et cuperem ipse parens spectator adesset. 385
Fil. Parce pias scelerare manus! aut quo tibi nostri
Pulsus amor? si iuris materni cura remordet,
Natis parce tuis et nos rape in omnia tecum;
Quo res cumque cadunt, unum et commune periclum.
[Vmbra.] Aspice nos. adsum dirarum ab sede sororum: 390
Infelix simulacrum, laniatum corpore toto.
M. Quid dubitas? audendum dextra, nunc ipsa uocat res.
Auctor ego audendi, fecundum concute pectus.
Si concessa peto, si poenas ore reposco,
Nullum in caede nefas; [et] amor non talia curat. 395
Fil. Hostis amare, quid increpitas mea tristia fata?
M. Suggere tela mihi finemque inpone labori.
Sanguine quaerendi reditus.
Fil. Nec te noster amor pietas nec mitigat ulla,
Nec uenit in mentem natorum sanguine matrem 400
Conmaculare manus? nostri tibi cura recessit
Et matri praereptus amor?
M. Crimen amor uestrum spretaeque iniuria formae
His mersere malis. fratrem ne desere frater.
Poenarum exhaustum satis est, uia facta per hostis, 405
Et genus inuisum dextra sub Tartara misi.
Iamiam nulla mora est currus agitare uolantis.