Palmi, futuri regis inutiles
Omitte curas. Dudum adamantino
Cui fata subscripsere libro
Sarmatici diadema regni,
Non Auster illum, non Boreae domus,
Non limen Euri, non Zephyri dabit.
Rex est, Poloni, quem potenti
Rex Superum jubet esse voto.
Hic ipse (quamquam se propior daret
In regna princeps) miserat extero
A sole regem, qui relicta
Vela retro cito ferret aula.
Quo vana pulchrae nomina gloriae?
Quo pictus auro miles, et inclyti
Cessere Gascones? Inani
Spes tumidae crepuere vento.
Fortuna naves, et dubias agit
Fortuna pugnas. Haec popularibus
Utcumque se miscet catervis,
Ambigui regit ora vulgi.
Absiste verbis. Nos medio procul
Campo coronam figimus ardua
In rupe. Rex esto, priore
Quisquis emet sibi regna cursu.