Exteros mores prohibete pulchra
Lege, Thebani: patriasque leges
Et pios ritus, et avita natos
Sacra docete.
Templa Eas sanctum, fora lustret Aequum;
Veritas et Pax et Amor per omnes
Ambulet vicos: scelus omne casta
Exsulet urbe.
Nullus est murus sceleri. Per altas
Urbium turres triplicesque portas
Poena perrupit. Vigilant in omnes
Fulmina culpas.
Concolor vero dolus, et superba
Exsulet regni sitis, et cupido
Desidis lucri, tacitoque segnis
Copia luxu.
Publicos discat geminare census
Saeva paupertas: et in arma ferrum
Sit satis. Rapto male pugnat olim
Miles in auro.
Sive res bellis agitanda, sive
Pace, collatas sociate vires.
Alta centenis melius recumbunt
Templa columnis:
Inter errantem scopulos carinam
Certius plures docuere stellae:
Fortius proram gemino revincit
Ancora morsu.
Gliscit aetemo sociale nexu
Robur. Arcanas opulentiorum
Ira per rixas agitata magnas
Eruit urbes.
Haec ubi, dulci modulante nervo,
Dixit Amphion, ter eunte fluctu
Substitit Dirce, ter opaca movit
Terga Cythaeron.
Saxa repserunt, scopulique circum
Devio campos petiere saltu,
Et nemus pronusque silex ab alto
Monte cucurrit.
At simul vates tacuit; per omnem
Barbarae rupes coiere murum, et
Septies clausae steterunt aheno
Cardine Thebae.