Qualem e nivosis Eridanum jugis
Primo cadentem leniter agmine
Festae Napaearum catervae
Trajiciunt, hilarique circum
Plaudunt natatu: mox ubi prodigus,
Et temperati marginis immemor
Prorupit, et praeterfluentis
Regna procul populosque lusit
Errore lymphae, degeneres simul
Ripaque et immensi hospitio alvei
Dignatus amnes, atque aquosum
Immodico bibit ore coelum,
Silvisque et arvis latius imperans
Ripam evagantis seditionibus
Metatur undae, jam natari
Difficilis, nimiusque campi.
Venti paventem non bene sustinet
Dorso phaselum, laetior arduas
Subire bellantum carinas,
Et galeis clypeisque longe
Clarus videri, donec Iapygas
Amnes avari fluctibus Adriae
Submisit, et majore ponto
Velivolum dedit ire Martem:
Sic te fluentem leniter aureae
Torrente linguae, prima per Italas
Clamata defatigat urbes
Eugenii pia cura patris;
Qui, bella regum et illacrymabiles
Rerum tumultus flectere providus,
Mundi laborantis ruinas
Extulerat subeunte collo.
Sacrique Veri solliciti patres,
Quos infidelis littora Bospori,
Rubrive submisere ponti
Regna Paraetoniive Nili,
Lectum remotis consilium plagis
Rerum potentem visere Tusciam, et
Leges peregrinosque ritus
Dardaniis sociare sacris.
Hic tu profanis cassa furoribus,
Doctisque narras proelia vocibus
Pugnata, clainatumque Martem,
Qua vitrei ruit amnis Arni.
Nec otiosae more licentiae
Exaggerato defluis alveo:
Sed plana per rerum profundo
Ore ruis mediusque ripae.
Mox et citato plenior impetu,
Linguae sonoro flumine devehis
Clasemque et evagata longe
Ambracio pia bella ponto.
Quo nos avorum bella trahunt, retro
Seri nepotes ibimus? Ibimus
Pulchros redordiri labores,
Et veteres reparare palmas!
Solusne palmas, solus Achaica
Obliviosi nocte silentii
Abducit Abramus tropaea,
Et veteres revocat triumphos?