Non Hydaspeis, Arimine, gemmis,
Non domus flava laqueata cedro,
Aurei torrens neque te beatum
Fecerit Hermi.
Mitte sectari, quis amoena praeter
Prata non parco fluat amnis auro,
Sit satis virtus, animosa sedes
Visere divum.
Alter effultos adamante muros
Tollat, aut caesas Sipylo columnas,
Fossor inspecta Styge quas revulso
Subruat Orco.
Ditior silvis habitat Sabaeis
Ales Eois renovata bustis:
Ditior gemmis rutilo vagatur
Piscis Hydaspe.
Alter Eois variam lapillis
Subliget zona retinente pallam:
Alter insignes Tyrio lacertos
Vinciat ostro.
Gratius laeves variavit alas
Sparsa nativis Philomela guttis;
Pulchrius Thressae maculosa pingunt
Pectora lynces.
Tonsa nos vestit pecus, et luporum
Terga mentimur: neque flava vestem
Dedecet vulpes, et abacta caeso
Castore pellis.
Una mortales numero ferarum
Eximit virtus, volucerque notas
Siderum sedes animus solutis
Visere pennis.