Regias veto manus
Tagi serenis imminere rivis.
Utili placet luto,
Fucumque nobis fluctuantis auri
Flavus allinit liquor:
Ex quo superbi dives amnis Hermi
Sordidum lavit Midam,
Rudique limum duxit e tyranno.
Ite, mobili vitro
Albive Cydni, lucidive Xanthi,
Ite, principum manus,
Auri coruscas submovete labes.
Rivus integer viti,
Suaeque purus consciusque lucis,
Praeterit fidelius
Regumque somnos Caesariunque palmas.
Dulce purpurae decus,
Tuam micantis innocens metalli
Amnis irrigat manum:
Midamque, princeps, Tantalumque rides.
Vitreus tibi latex,
Lympba sequaces evocante lymphas,
Lubrica placet fuga,
Qua fervet Arnus, garrulumque pratis
Unda promovet pedem,
Ripasque pingit, candidique fontis
Uda volvitur dies.
Hic thymbra poscit, hic amoeniores
Humor educat rosas,
Et cana nardus, filiique veris
Hinc et hinc bibunt croci,
Vivumque potant fluminis pudorem.
Hic comata lilia
Passisque Majus ambulat capillis.