Eheu! quo citharae sciens,
Et Bacchi calidis fervida jurgiis,
Laevini, ruit indoles,
Imbellem strepitum et docta procacibus
Saltum fingere classicis,
Auditoque choros cogere tympano,
Et mensam clypeo super,
Et plenum galeis ducere Liberum!
Non hoc pectore Thracios
Inter Sarmatici fulmina proelii
Fudit Visnovius globos,
Et Thracum volucres contudit impetus.
Ille et sanguineis super
Fumantum cumulis haesit Iazygum, et
Alti navita sanguinis
Portum non soliti nominis attigit.
Illum Thraces, Achaicis
Rimati gladiis, pectoris invia
Dimovere repagula:
Et cor, et tepida morte fluens jecur
Devesci, et pia carpere
Ausi sacrilegis viscera morsibus.
At non egregiam quoque
Libarunt animam, nec Mareoticas
Pavit fama libidines,
Aut secura Getae dentis adorea.
Eheu! stringite, posteri,
Ferrum belligera stringite dextera.
Heu, primam gladii sitim,
Pubes, Odrysiis imbue caedibus,
Confossisque reciprocum
Rursum pectoribus reddite sanguinem,
Dudum in corpore Bistonum, et
Venis immeritum fervere barbaris.