Si quae juvabit dicere saucium,
Permitte, Publi, compositam male
Loqui cicatricem, et latentes
Parce animo sepelire curas.
Secura ferri robora saepius
Occultus ignis subruit: et super
Minora silvarum caducum
Traxit onus, nemorumque famam
Stravit virentem, quam tonitru levi
Quondam favilla lambere gestiit
Impune. Te longus silendi
Edit amor, facilesque luctus
Hausit medullas. Fugerit ocyus,
Simul negantem visere jusseris
Aures amicorum, et loquacem
Questibus evacuaris iram.
Olim querendo desinimus queri,
Ipsoque fletu lacryina perditur:
Nec fortis aeque, si per omnes
Cura volat residetque ramos.
Vires amicis perdit in auribus,
Minorque semper dividitur dolor,
Per multa permissus vagari
Pectora, nec rediisse quondam,
Pulsus superbit. Vise sodalium
Coetus; et udis sic temere jace
Infusus herbarum lacertis,
Ad patrii leve murmur Hallae.