Quo te dearum nomine consecrem,
Vicina cani Nympha Borysthenis?
Themisne, an una Gratiarum
De tribus excipiere divis
Scribenda Drie? Cedit aquis tibi,
Utcumque pictis fertur oloribus,
Cretaque, et innantem relinquit
Oceano Cytherea Delon.
Hinc et severo migrat ab Algido
Parum serenis Cynthia comibus,
Quamvis anhelantum lacessat
Ira canum, teretesque rumpant
Virgulta damae: Sed tibi dulcius
Tranquilla rident Palladis otia;
Seu tela non mendax retexto
Bella virum simulare in auro
Mensem fefellit, seu tibi Coelitum
Vestire nudas spiritus incidit
Aras, et aulaeis et ostro
Pauperibus placuisse Divis.
At non inani Fama canit tuba
Te vi potentis non sine consili
Ventura tangentem sagaci
Mentis acu celerique cura.
Tristis videri prodit, et unice
Sibi serenis pervigil in genis
Lucet venustas: seu coruscum
Caesariem tibi pingit aurum,
Non indecorae nube modestiae
Extinguis aurum vilius adspici,
Gemmasque nolentes latere
Moribus ingenioque celas.
Hinc inde rubris Creta coralliis,
Illinc smaragdis fulguret India:
Cum pura virtus fulsit, omnes
In tenebris latuere gazae.