Cum tu, Magdala, lividam
Christi caesariem, cum male pendula
Spectas brachia, pro! tibi
Pectus non solitis fervet amoribus.
Non es, qualis eras: tibi
Non mens semianimis restat in artubus:
Non fronti tenerae nives,
Non vivax roseis purpura vultibus,
Non notus superest color:
Sed mors marmoreis pingitur in genis,
Et vitae gracilis via
Exili tacite spirat anhelitu.
Non, me si satis audias,
Plores perpetuum tristia: tertia
Cum lucem revehet dies,
Mutati referet munera gaudii.
Nam quae sole caret duplex,
Ridebit geminis tertia solibus.