Age, picti moderatrix dea mundi,
Quate pulso titubantes pede nimbos,
Age, claras famulantum quate pennas Aquilonum.
Glacialis rege currum Cynosurae,
Cata spissos super imbres equitare,
Simul Euros animavit generoso tuba cornu.
Tibi plausus populari vagus aura,
Tibi pulchrae sociali vice laudes
Famulantur salientum comitatu chorearum.
Tibi septem Tiberinae juga ripae
Saliari cita gyro glomerantur:
Tibi longus per apricum salit ordo thyasorum.
Age, sacrum glacialis jubar Ursae,
Cane Medis, cane flavis Agathyrsis;
Cilicumque et pharetratis Nasamonum cane turmis.
Tibi, princeps, opulenti liquor Hermi
Grave nomen fluviali linet auro:
Tibi carmen pretiosa perarabit Tagus urna.