Non me Democriti sales,
Non me Cecropii porticus atrii,
Non percussa docentium
Delectant calidis pulpita jurgiis,
Vel quae pectoris impotens
Clamosi celebrat turba Panaetii;
Vel quae Pythagorae senis
Docta tusse crepant. Me veterum frequens
Memphis Pyramidum docet:
Me pressae tumulo lacryma gloriae:
Me projecta jacentium
Passim per populos busta Quiritium,
Et vilis Zephyro jocus
Jactati cineres, et proceram rogi,
Fumantumque cadavera
Regnorum tacito, Rufe, silentio
Moestum multa monent. Mihi
Pompei gelido sub Jove segreges
Artus, et lacrymae carens
Desertoque vagum littore funus, et
Magni nominis indigum
Corpus, magniloqui verba Panaetii
Compensat brevius; neque
Regales patitur quaerere copias.
Nolim Pieriis macer
Insudare libris, aut tacito vigil
Impallescere Socrati:
Si regum titulos, et tumulis super
Fulgentem premo gloriam, et
Calco nobilium nomina Caesarum.