Jam minax Albis, domitusque late
Rhenus asserta famulatur unda:
Jam fluunt pronis tibi regna, Ferdi-
nande, tributis.
Turma, pugnaces populata Dacos,
Hausit imbellem galeis Tibiseum,
Fessa bellorum, pavidumque telis
Sepiit Istrum.
Ille terrarum fragor, ille magnae
Fulmen Europae, Scythici tremendus
Arbiter ponti, piger obsoletis
Abstinet armis.
Jam sacrae leges, et amica legum
Jura civiles cohibent tumultus,
Et Fides, et Fas, et aperta laeto
Gratia vultu.
Jura pacatis dominantur agris:
Jura compescunt grave classicorum
Murmur, et currus, et hiulca rauci
Fulmina belli.
Pax ubi clausas moderatur urbes,
Illa vittatis operatur aris;
Illa vicinis studet aemulari
Sidera templis:
Quaque pubentes graditur per herbas,
Hinc et hinc divam comitatus albo
Messium fluctu Cerealis undat
Merges aristae.
Longus herbosis spatiatur arvis
Ordo virtutum; niveaeque juncta
Faustitas Paci legit otiosis
Lilia campis.
Ite, Rhaeteis sociae triumphis,
Ite, delectos religate flores,
Ite, virtutes: iterate nexis
Serta tropaeis.
Te Ceres flavis redimita culmis,
Magne pacati moderator orbis,
Te Jovis quercus, et Apollinaris
Umbra corymbi,
Te volunt lauri: Tibi se Latini
Arbor Alcidae probat, et supinis
Annuit ramis, et amica circum
Tempora serpit.
Q lio velis crinem cohibere serto,
Mitte cunctari: tibi colla circum,
Herculis ritu, fluat usitata
Populus umbra.