Nam quae purpureis fumet honoribus
Formoso melior de grege victima,
Quam cui solliciti vomeris aspero
Ussit colla labor jugo?
Condit regna labor. Fabricio bene
Findenti patriis jugera sarculis
Frondent in mediis sceptra novalibus
Pulchrae messis adoreae.
Rastrisque et rigidis parce ligonibus:
Uncum, lictor ait, rejice sarculum:
Quae sevit Cererem, regna metet manus,
Glebae fraude superbior.
Jam nunc emeritos solve jugo boves,
Jam nunc nobilium colla Quiritium
Aequi flecte memor, parcus et abstinens
Romani pater imperi.
Fortunae memores nunc, age, victimas
Justo mitte Jovi. Quae modo mugiit
Sacris Pontificum digna securibus
Aras illinet hostia.
Numquam puniceis hispida crinibus,
Martis belligera pendula fraxino,
Auri deciduis vestierat jubis
Grajum pellis lasona;
Si non difficiles imperii boves
Egisset domina vertere dextera
Ferratis Chalybum saucia dentibus
Colchi littora Phasidis.
Quamquam fulmineo pectoris halitu
Sorberent animosum agricolam boves,
Et fumi fluvium et noctis inhospita
Circum nubila funderent:
Nec quidquam viridum e semine dentium
Bellator jaculis campus inhorruit,
Et late peperit castra virentibus
Cristatus galeis ager.
Quippe ad Thessalici fulgur acinacis,
Natali immoriens occubuit metu
Tempestas peditum, et densa micantium
Hastarum interiit seges.