Quis temperatae flumine copiae
Siticulosis influit auribus
Facundus amnis, et sequacis
Agmine luxuriatur undae?
Rursumne torvum cantibus Aeacum
Delenit Orpheus? quo duce, Thraciae
Aurita reptavere saxa, et
Aemoniae saliere rupes:
An Daedalei pectinis arbiter
Vates amica Pierias lyra
Triumphat aures, et disertos
Eloquii reseravit amnes?
Qualem pudicis Penea fontibus
Admurmurantem Thessaliae juga
Mirantur, aut praetervoluto
Attonitus stupet Haemus Hebro
Qualemve puris Parthenium vadis
Dignantur alto muta silentio
Pangaea, vel circumsonantem
Castaliis Helicona ripis
Parnassus audit, dum nova gaudia
Jam jam futuri veris aventibus
Enarrat agris, et virentem
Exsilio remeare Majum.
O quis latinae fons opulentiae
Exuberanti vividus impetu
Bacchatur, et lymphata secum
Corda rapax animosque volvit?
Qui nunc profundo volvitur alveo
Sententiarum, nunc gracili fluit
Torrente linguae, nunc apertis
Ingenii spatiatur arvis:
Suique late pronus, et insolens
Exire ripam, non tamen obvia
Captivus alga nec tenaci
Ire piger per aprica limo:
Sed clarus auro fertur, et Atticis
Ludit smaragdis, non sine consono
Liquentis electri susurro, et
Murmure praetereuntis auri.
Non stagna Cirrhae, non ego Phocidos
Desiderarim: Te prope vitrea,
Urbane, Dirce, Te fluenta
Virginei comitantur antri:
Olimque simplex collis et invius,
Nunc hospitalis, Te duce, Dardanae
Parnassus immigravit aulae,
Et Latii rediere vates.
Magnusque tanto Pindarus aemulo
Minor videri gaudet, et Appulae
Miratur lncredem Camoenae
Pegaseos vacuare fontes:
Seu. dithyrambo liber, inutilem
Verbis catenam demis, et affluis
Impune; seu rursum severo
Verba placet cohibere nodo.
Sed non profanae gloria laureae,
Umbrata Grajis tempora frondibus
Accomit, at conchyliata
Pulcher honor redimit corona,
Et dedicatam purpura laureae
Furata frontem subrubet. Hactenus
Florete, vates: jam latino
Vester honos adolevit ostro.