Nunc Andreae solemnia
Laetis canamus vocibus,
Apostolatus gloriam
(0632C)Qui ornat triumpho sanguinis,
Quem piscibus per turbida
Dum rete nectit aequora,
Christus vocavit cum suis
Ad regna coeli fratribus.
Misitque late gentibus
Verbum salutis pandere,
Ac saeculi de fluctibus
Mentes levare credulas.
Qui mox fidei lampade
Dum lustrat oras Graeciae,
Deique Christi fulgidus,
Erroris umbras effugat.
Achaeus armis appetit
(0632D)Dux lucis arma tetricis,
Miles Dei sed fortiter
Hostis repellit impetum.
Pandit crucis mysteria,
Quae dira mortis pristinae
Solvit potenter vincula,
Mundoque vitam contulit.
Agni refert et hostiam,
Qui nos ab hoste liberans,
Vita beat trans aethera,
Regnoque secum perpeti.
Inclusus atro carcere
Lucis minister, aurea
Pacis vias ad sidera
Pandit catervis plebium.
(0633A)Caesus flagellis septies,
Tormenta risit omnia,
Septena quam repleverant
Jam dona sancti Spiritus.
Tandem levatus in crucem,
Terram reliquit sordidam,
Mundisque felix passibus
Poli petivit januas.
Excepit alma civitas,
Nostrumque mater omnium
Laetata Christi martyrem,
Apostolumque maximum.
Congaudet omnis civium
Nobis chorus coelestium,
Magni videns perennia
(0633B)Nunc Andreae solemnia.