(0631B)
Adesto, Christe, vocibus,
Inesto nostris mentibus,
Tua benignus dextera
Choros canentum protege.
Qui natus es de Virgine,
Nostrae salutis gratia,
Da pura nobis pectora,
Da membra casta corporis.
Et tu beata prae omnibus,
Virgo Maria, feminis,
Dei Genitrix inclyta,
Nostris faveto laudibus.
Pudica cujus viscera
Sancto dicata Spiritu,
(0631C)Davidis ortum semine,
Regem ferebant saeculi.
Beata cujus ubera
Summo repleta munere
Terris alebant unicam
Terrae polique gloriam,
Festiva legis quae sacris
Ad alta templi limina,
Coelestis aulae Principem
Ulnis tulisti dulcibus.
Cujus sinu jam parvulum
Magi videntes conditum,
Regem Deumque maximum
Votis precantur redditis.
(0631D)Christum ferens Memphitici,
Quae sacra vertis numinis,
Deumque cernunt exteri,
Fugant sui quem patria.
Quae moesta mundi gaudium
Cum patre Joseph quaeritas,
Summique Patris aedibus
Ovans sedentem repperis.
Cujus rogatu mysticas
Christus sedens ad nuptias,
Aquas in alma transtulit
Vini rubentis pocula.
Cujus pium pertransiit
Ensis doloris spiritum,
Natum tuo de corpore
(0632A)Deum mori dum cerneres
Quam filio tonitrui,
Crucis tonans de vertice,
Commendat Auctor aetheris,
Ut virgo servet virginem.
Nati Deique jam tui,
Quae cernis almo lumine,
Post dira mortis vincula,
Resuscitati gloriam.
Lucem poli quae conspicis,
Adire Patris dexteram,
Quam prima Patris de sinu
Terras adire videras.
Sublimis inter splendida
Apostolorum sidera,
(0632B)Flamma, sacrique Spiritus
Impleta laudes concinis.
Laudem Deo quam supplices,
Christo canentes, reddimus,
Christi Genitrix, et tua
Commendet intercessio.
Hymnos sacrae quos Virgin.,
Matrique castae dicimus,
Emmanuel, tu suscipe,
Tuamque plebem libera.