Est pastinacae virtus in semine tantum
et radice sua; mulsa si decoquis ejus 1265
radices, multum decoctio proderit ejus,
si potanda datur, splenis jecorisque querelis,
lumborumque levat eadem potata dolorem.
Hanc si lacte coquas, decoctio sumpta juvabit
asthmaticos quamvis veteres ventresque fluentes. 1270
Radix illius collo suspensa tumores,
ut quidam dicunt, compescit testiculorum;
qui pastinacam fert aut qui mandidit illam,
dicitur a nullo serpentum posse noceri.
Accendit venerem si large sumitur illa. 1275
Si circumscalpis dentes radicibus ejus,
dicunt ingenti persaepe dolore levari,
ex vino pastinacae si sperma bibatur,
compescit diros, quos scorpius intulit, ictus.
Sic quoque feminei ventris curare tumorem 1280
dicunt, quo mulier quasi praegnans esse videtur.
Appositum cancris tritum cum melle medetur.
Quod pastum tribuat est pastinaca vocata,
namque cibum nullae radices dant meliorem.