Origani vires calidae siccaeque leguntur,1285
tertius huic in utroque gradus conceditur esse.
Illius in vino curat decoctio sumpta
quosvis pestiferos morsus, si saepe bibatur;
cum mulsa sumptum prodest aconita bibenti,
sic multis aliis dicunt obstare venenis. 1290
Conquassata juvat mansum vel saepius haustum,
hydropicos reprimit bibitum siccatque tumores.
Cum mulsa bibitum choleram deponere nigram
dicunt, oxifali fuerit si pondere sumptum.
Menstrua reducet bibitum vel si superaddas 1295
tritum, vel cocta mulier si se fovet herba.
Illius pulvis tussim cum melle repellit;
pruritus, achoras maculasque cutis fugat omnes,
in quo decoquitur si saepius amne laventur;
in lavacro juvat ictericos haec coctio sumpta;1300
succus praedictae viridis si sumitur herbae,
uvas et fauces curat siccando tumentes;
oris vulneribus medicabitur ore retentus;
naribus infusus irino mixtus olivo
invisum capiti coget manare cruorem;1305
auribus infusus sedat cum lacte dolorem;
hic succus mixtus cepis et rhô syriaco
ponitur ad solem tunc quando Sirius ardet,
sicque quaterdenis fervebit in aere diebus,
si supponatur lecto confectio talis,1310
effugat (ut dicunt) animalia cuncta nociva.
His quibus ex aliquo vitio digestio tarda
evenit, ex vino prodest si sumitur albo;
cum calida morsus stomachi lenire probatum est.
Illius succos oleo mixtos et aceto 1315
succida lana bibat, et sic superaddita membris
luxatis et contusis multum juvat illa.
Provocat urinam, lumbricos projicit haustum,
dente diu tritum solet inde fugare dolorem.
Omnia potatus succus juvat interiora;1320
ejus cum succo si carica trita bibatur,
sudorem poris producere fertur apertis,
appositus coxis succus cum polline farris
harum saepe gravem pellit reprimitve dolorem.