Qui virtute regit mundum, pietate gubernat,
Rebus cum humanis tunc bene gessit ovans,
Cum tulit infando ferali hostilia monstro,
105.0374A| Explendum ad facinus mentis ut impos eas
Deque malo placidum tribuit medicamen iniquo,
Temperat atque bonis damna pavenda suis.
Scorpius in nitido si trux perimatur olivo,
Exsuperat virus illius iste liquor.
Delibuta recens isto si plaga liquore est,
Ne possit virus laedere virus agit.
Sic vitio vitium, sic morbo morbus abibit,
Unum sic uni cedere saepe solet.
Et cuneum cuneus, seu clavum clavus abactum,
Impulit, hoc illud mox veniente perit,
Sic lapis et lapidem, seu lignum ligna retundunt,
Atque chalybs chalybem cudit, et arte polit,
Hoc reprimendo malum tribuit solatia Christus,
Antichriste, tuos seu breviando dies.
105.0374B| Ne ferale malum modulis inolesceret atris,
Clauditur angusto temporis id spatio.
Temporis illius probrosa pericula prodit
Vatidicus lituus, rex pie Christe, tuus.
Tunc erit, auctor ait, rerum tribulatio magna,
Proh! nec erat nec erit qualis ab usque chao.
Qui breviabuntur perfecto examina soles:
Sin alias, omnis non caro salva foret.
Hoc bene respectu Domini quo cuncta geruntur,
Congrua disposito tempore cursus aget.
Tertium ut excedat, quartum non impleat annum,
Impia tempestas et truculenta lues.
Tempus, ait Daniel, seu tempora, semivagumque,
Volvenda illius tempora saeva mali.
Sicque quaterdenis haec mensibus atque duobus
105.0374C| Hoc ipsum narrans explicat atque canit.
Unum per tempus, geminos per tempora signans,
Per semum menses sex fore rito docet.
Summaque sic mensum numerum concurrit ad istum.
Tres anni et semis, nil mage, nilve minus.