I. IAmque remensus iter per vasta silentia noctis
Tyroglyphus , reperit Mausolum forte severa
Iura suis dantem, et timidum de tristibus actis,
Culpantemque moras non iussa exspectat, ad arma
Vociferans: date tela viri; Physignathus omnis
Egreditur: scelus, arma parat: non aestimat aequum:
Legatos temerat. date tela. erumpite castris.
Erumpunt: quales apri, quos tristior antro
Clausit hiems: simul insequitur venator, et hastam
Intorquet librans certae irritamina vocis:
Ocius una omnes frendent. stant horrida saetis
Tergora: fulminei stringuntur in obvia dentes.
Pastor ad haec pallet trepidans, et fronte relicta
Histricis in morem surgunt horrore capilli.
II. Et iam intra iunci iactum bellator uterque
Stabat, et erectum tentabat figere peilum.
Admoratque tubam diffundere classica iussus
Hypsiboas . fremitum lituis maioribus augent
Conducti Culices ( Cilices dixere Sabaei )
Principium tristi pugnae ferale daturi.
Sed suprema Iovis praevenit buccina signum.
Intonat, et nimbis Aquilo submugit hiulcis.
Calliope : namque ipsa Duces cognoscere belli
Diceris, et fatum cuiusque notare lapillo.
Quippe memor: seu quos inimica incendia Troiae
Hauserunt; seu quos Simois demersit et aequor
Tyrrhenum , Siculumque fretum , Dolopum que cruentae
Deiecere manus, et Doricus abstulit ensis.
Da Vati memorare tuo, quo lancea primo
Quaeque inter Mures Ranasque sit acta per auras.
Quod genus occiderit: sint et sua nomina famae.
Primus in adversum fertur Physignathus hostem,
Armiger ad latus, et calamis impleta resectis
Corytos: quamquam cursum natura retardat.
Intumuit virtus Sociorum prodiga vitae
Exemplo, viresque capit de rege propinquo.
Corripiunt spatia, et medio gradiuntur in orbe
Lunatamque aciem reddunt. hac arte laborant
Effusi circo Cephalos includere furvos.
At Mausolani protecti corpora scutis
Ante dolo adverso, late in contraria vertunt,
Cornuaque extendunt equitum. Dictator amarum
Praefurit, et totas secum iubet ire catervas.
Qualis in arma leo fulva cum coniuge vadit,
Si quando stimulavit Arabs : negat ille timere,
Sed ruit horrendum assultans, catulique sequuntur.
Iamque adeo miscent facies, haeretque viro vir
Consertus. desis acubus iuncisque serenum
Aufertur. pudor est, obnixae cedere turbae.
Ut si tabe nivis verno iam sole solutae,
Montibus hibernis, geminus de vertice torrens
Descendat, pugnentque suam confundere brumam:
Mox ubi convallis mixtos angusta recepit;
Ire simul spumant. tamen et violentior unus
Fluctuat ambiguum, fluvioque immania iuncto
Saxa rotat: mox et totus luctatur in arva.
Sic Glauci Mauri que ruunt; sonitumque volutant
Acceptum late loca: donec inertia passim
Corpora volvuntur tellure cava depressa.
Quot tumidi montes, praeruptaque culmina surgunt
Carpathio in pelago fundum verrentibus Euris:
Funera tot dispersa iacent, gressumque morantur.
III. Limnisii instantis telo cadit alite fixus
Sitologus : felix et non ignobilis olim
Miles in Atraciis campis, aptusque legendis
Thessaliae spicis. cadit, heu, germanus eadem
Sitophagus canna. nam dum discrimina ferro
Dissipat alterius; meruit procumbere fratris
Ante pedes. multum ore pares et corpore toto;
Denati natique simul generosus uterque,
Castoris ingenium, Pollucis et ora ferebat.
Illi traiectae fauces haerente sagitta:
Huic medius pulmo iunco stridente reclusus.
Nunc inhumata iacent durante cadavera bello.
Ah! alias saevas arguti evadere Feles.
Ecce volat sublimis acus contorta per auras
Limnisium que rapit. pavet auctor vulneris huius.
Seque ostentat agens tamen, et sua praemia poscit.
Artis opus: recta vitae in penetralia misit
Sterneris hoc telo, pronaque extenderis alvo
Batrache subsiliens; tepidam non amplius undam,
Sed Phlegethonteam posthac bibiture paludem.
Inde furore semel concepto saevior arsit
Tyroglyphus : (namque ille fuit, quem missile tanto
Funere donarat) veluti Gangerica Tigris.
Cum semel armentum coepit vastare, famemque
Sanguine permulsit; saturari immitis, obesa
Colla ferit maiore gula. Grex omnis in uno
Spirans ore tremit, gemit inter funera pastor.
Haud aliter Maurus propulsa per agmina praeceps
Emicat: et simul hunc, simul istum diripit ingens.
Hunc recto gladio, tortis hastilibus istum.
Hic cecidit pronus, collabitur iste supinus.
Pileon retro nuper plaudebat et ante:
Nunc retro solum: neque enim miser audeat ante.
Crambophago excutitur viridi coniuncta galero
Cochlea: sed vano (nam se sinuaverat) ictu
Lancea transabiit. galeae non ille cadentis
Sollicitus; sollers autem metuensque pericli
Fugit ad extremos, voluit Polyphonus euntem
Perculsus terrore sequi: qui poplite caeso
Sistitur, et multas una cum sanguine voces
Evomit, ac tristi maneis clamore salutat.
IV. Musulmannigenae laetis successibus instant,
Caligantque bonis fatis. campoque fruuntur.
Integra iam legio patitur; caesimque resectus,
Vel punctim fixus lacero cadit agmine miles
Batrachus. in pedibus non est spes ulla salutis.
Quis cumulum illius cladis stipataque plaustris
Funera describat? caedenteis sustinet una,
Altera pars caedit. quidam et fugientibus usi,
In caput impingunt clipeos, in pectora testas.
Tam robusta prius, confertaque Glauca iuventus,
Perdita paulatim spatio vanescit inani.
Ut cum semiferi caluere in proelia Thraces ,
Indomitum cratera inter furiosaque vina:
Ingens fervebat numerus, pecus omne biforme,
Centauri : mensis ubi pugnavere remotis;
Vix ullus superest. silet evacuata taberna.
Hic manus, hic costae poplitesque, immania membra,
Foedo more iacent truncis ruber ebria fossa.
Limnocharis tanti quia Tyndaris altera belli,
Paelex Argivae non impar femina lenae:
Territa conflictu (media in certamina traxit
Hanc quoque dirus amor) non sussicientibus armis
Qua gaudet, repetebat aquam, quis Fata retardet?
Illam erumpentem et multo conspexit opertam
Pulvere Mausolus , quatiens forte obvius hastam:
Et secum abduxit pedibus post terga revinctis;
Gaudia servilis lusus post bella daturam.
Heu! misera et foedo mortis devicta timore
Rana Helena , ah nescis veri discrimina Martis
In galea. quid Fata fugis? fugientia pulsant
Agmina. praestaret ritu pugnasse Camillae.
pulchrius in media virtus succumbit arena.
Iam vastata phalanx, viduataque cornibus ibat?
Iamque alios alius super exporrectus in armis
Occupat Artophagi sica. qui se omnia in ora
Vertit, et in telum rapit obvia quaeque: canistrum
Et Cererem , non hos concessum munus in usus.
Assuetus vitiis Lichenor praedo, cadaver
Exspoliat, quodcumque ferit; defossaque gibbo
Ranarum, illecebris inhians, spolia ampla requirit.
V. In modico clivi cilio, quod respicit Austrum,
Hypsiboas stabat, pugnanteisque ore ciebat.
Illum Lichenor tractus nidore rapinae
Olfecit, praedamque recens. mox ordine rupto
Occupat ascensum, tacitoque per edita gressu
Nititur, et stricto terret mucrone: quid inflas
Osque cavum exerces? vires, ait, exsere, vires.
Tympana tolle tua: aut albenti ventre verutum
Accipe: (et ante ferox crispaverat ora verutum.)
Ius sacrum salvi capitis praetendit, et orat
Hypsiboas veniam, sancitam gentibus olim.
Cui nociturus enim Tubicen? quem laedat in alto
Colle situs, Marti que canens? Maurusius ater:
O nate in Phrygiis Lacubus segnique palude,
Et non Oceano, vel bellatricibus undis:
Quas voluit Thybris Pater , Aeiolus que Achelous ,
Frustra iura citas: quando sub iudice ferro
Vivimus: hoc legum vindex, mensura rigoris.
A capulo, non a patulo Victoria rictu
Dependet. vincit miles, qui robore vincit.
Vix haec effatus resupino incurrit, et ictu
Deicit. audivi Ducibus te, Batrache, certos
Delicias nutrire pedes. da hoc munere vesci.
Nobiliore nequis cella, tumuloque sepultus,
Quam sit aqualiculus noster, meliore recondi.
Sic ludit verbis, et crus praedulcis opimi
Amputat, inque suam mittit ientacula peram.
Vix ea: cum findens immani turbine campos
Aeris hasta volat, valido Lichenora flictu
Corripiens. trahitur diris devotus et ardet,
Contemptumque luit. subitum per et ilia telum
Exactum est laevumque latus. quis torserit auctor,
Agnosci nequiit. quis enim? nisi Iuppiter ipse
Ad Minoa citans sontem. nam tempore ab illo
Musulmannorum res est sublapsa referri
Visa retro; obscuraque manum de nube sinistram
Tollere sidereus Pater, atque avertere vultum.
Quondam etiam Ranas oculis Deus aspicit aequis,
Immittitque animos, stimulatque insurgere in hastas,
VI. Inclinatam aciem toto Physignathus agro
Colligit: o segnes, qui sic in bella venimus.
Ardor ubi vultusque truces, promissaque vota?
At non et pigri clamoribus inter aquosas
Naiades vestrosque lacus: ubi signa choreis
Tritones dederint; tum vos statione movetis:
Tum pedibus quatitisque salum, et vada caerula lapsu
Verritis, atque hilaris lascivia regnat in alga.
Nunc, cum pugnandum est, armis marcere remissis,
Degeneres iuvat, et linguis pro viribus uti
Si quibus et virtus, pudor et dolor, iraque luctu
Mista super, nec adhuc Neptunus pectore totus
Abscessit, sanctusque Tridens: nova fata, Deosque:
Ipsi ipsi faciant, meme et mea signa sequantur.
Sic ait, inque globum pulchre moriturus et hastas
Irruit. audentem furor et fortuna gubernant.
Qualiter elisis contortum nubibus exit
Fulmen, et in terram cum strage, fragore, tumultu
Praecipitante ruit; Mundumque ex aere lapso.
Territat igne volans, et ab omni parte timetur.
Tali, si qua fides, cursu Rex fertur in hostem.
Caetera plebs imitata. pudet sine caede reverti.
Dat cuneus late sulcum divisus; et astu
Cornibus exclusis Physignathus omnia tentat:
Saepe aliquid, quod nec suasisset nobilis ira
Aeacidae . Mauros ille implacabilis, ille
Concitus AEthiopes vel pone vel ante repertos
Perforat. Artophagus canna in pulmone recepta
Volvitur, eiectatque animam; atque in terga recumbit.
Eripit hostilem parmam, et defensus utraque
Pelobates , multorum humeris inopinus inhaeret.
Applauditque solo; et septena cadavera saepe
Uno continuat iunco, ferit inguina fortis
Tyroglyphi , galeamque rotat, vexillaque fracta
Discutit: et fixo comitem mucrone sub umbras
Mittit Pternophagum : adverso cui corpore plaga
Sedit, et ad costas cordisque repagula venit.
Librata aversum beta. caput Embasichytri
Detruncat, corpusque cadens proculcat eundo.
Haec addens: iam nigra tibi dent Tartara cenam
Cerbeream . neque enim posthac gustare licebit
Furtivas epulas: sed quam Proserpina furno
Admovet, incensam coquus ingredieris in ollam.
VII. Straverat et plureis, nisi fortior Artepibulus
Tardasset cursum. ferus ille, atroque colore
Obsitus amentat, iaculumque immane recedens
Expulit. it pars rapta veru, iugulumque cruentat.
Concidit exanimis subito: pus effluit atrum.
Non utique hoc dignus leto. sed stare secundis
Quis potuit rebus, votoque beatior esse,
Quam voluere Deae? maneis ulturus amicos
Insidiatorem Cereris Calaminthius urget.
Huc sacrae Aonides , Vatis fulcite laborem.
Seu Turnus Divum invidia defunctus in atrum
Memnona se vertit, maioraque membra subegit
Forma minore modo, minimosque redegit ad unguen
Seu ferus Hippomedon Craenaeum flumine mersum
Mus factus post fata luit: novus ecce duello
Exprimit Heroas veteres, animamque trilibrem
Artepibulus habet. stans obtruncatur, et ipsis
Vivit in exequiis. umbrae cane Musa triumphum.
Contendit Glaucus vires: sonuere reducta
Vimina, et ingenti tonserunt nubila iactu.
Musculus obliquo sinuamine corporis arcum
Eludit: tremuere quater cum cuspide nervi
Vibrantes: quater exhausit solertia cannam.
Horrendum visu! disrupto in fine tenore
Concita, et ad Ranam retro dubitanda caventem
Fata, per has venit, quas perfulcaverat auras;
Et paene assiliens. An lusus? an error? an omen!
Eminus haec: at non pariter, Calaminthius in quit,
Cominus evades pugnanti, o perfide: necte
Eripiet nobis cum tota Colchide coctum
Hippomanes , si quod linxti. pudor, arte profana
Militis in bello, et damnatis ritibus uti.
Si tibi mens non laeva foret, iustumque probares
Et veniens a morte decus, tua pectore nudo
Non in Thessalica virtus radice lateret.
Maure niger, DI te perdant; et stridula circum
Occisi volitet funus Psicharpagos umbra.
Congredere, ut glaciem quamcumque Artmisia fibris
Inspersit Medea tuis, hoc ense resolvam
Sic fatus, quem Troxartes aptaverat ensem
Falcatum ex beta, ter in orbem et in aera ductum
Vagina nudat, miscetque immitia verba,
Terreri indocilis stat masculus Artepibulus ,
Obliquatque latus; ceditque, instatque, premitque
Cautus, et obsequio membrorum temperat ictus.
Hos cavet, hos pellit sollers, et obumbrat et exit
Pronior, atque humilis tangi, mediusque timoris,
Tu reptare putes, simulat tamen, oraque retro
Abducens, magno nisu vestigia figit,
Ex improviso tollit se in vulnera rectum,
Et fit eques, totoque alium stat corpore supra.
Alter ad haec anceps: magicisne rigesceret herbis
Musculus esuriens in trulla forte repertis:
Et timet et terret: terrendo assurgit in altum
(Quamquam aegre) spernitque timens, et acinace lato
Sauciat, inflexamque secat radicitus aurem.
Dextra cadit: nihil ille notat metuitque sinistri;
Nec cecidisse videt: (tamen udi labe cruoris
Barba madet) perstatque gradu, velut hispidus ursus
Qui quadrupes lambit catulos; surgensque tuetur,
Defenditque bipes. Natis a Muribus olim
Contigit exemplum tam rari militis unum.
Batrachus indignans Fatis proprioque dolori,
Eductum gladium raptim cava tempora circum
Turbinat, et partem caulis iacit. ille remittens
Tela, micat rostro, inque pedes subducitur imos:
Et resilit, ludensque alios interserit ictus:
Nec timet urgeri. Capit ingens vulnus in armo:
Stat tamen. incisus pede posteriore vacillat:
Stat tamen, et necdum cedit, convitia Ranae
Ingeminans. tandem caput a cervice revulsum est:
Stabat adhuc; donec truncum pede propulit hostis.
Sic quoque cum cecidit, voluit nocuisse videri.
Fluxit in arma cruor, motu quo rivus in altum
Emicat, et spargit roranteis fontibus auras,
Quos retinere nequit collapso fistula plumbo.
VIII. Parte alia Regina furens Artemisia fertur.
Mausolum que iuvat, saevitque, et Amazonis imples
Implacata vices. quacumque impugnat, hiatu
Dissilit exsternata acies; multaque dolendus
Caede Paludanus Rex ardua funera plangit.
Hypsiboas claudus media tellure iacebat;
Quem tamen occurrens peltata Artmisia spernit;
Indignumque ira reputans mactare superbit.
Non humileis vulgi maneis, et caedere molleis
Corporibus; sed enim Ranas in casside clausas
Expetit, adversisque impingit pectus et hastam.
Prassiphagus cum Patre cadit: cum fratre sonorus
Craugasides : equites omnes. sed nullus eorum
A se ipso defensus equo est, confossa vomebat
Viscera Prassiphagus : telum pater ore momordit.
Craugasides reliquos animans ad proelia cives.
Cantu imperfecto, mucronem faucibus hausit.
Et fuit hic cantus casu lacrimabile carmen:
Quale strepat corvus moriens, vel noctua dira.
IX. Iam neque Troxartes , qui circum castra fremebat
Hactenus, ignavus pugnat; quamquam obsitus annis
Magnorumque altor furum, gaudere senecta
Posset, et emeritum guttur servare rudenti,
Aut Feli. nimium memoris dolor iraque mistas
Exstimulant luctu vires, adduntque nocendi
Robur, et ulcisci carum Psicharpaga suadent.
Te petit et clamat, te unum Physignathe poscit:
Te cupit occiso lacrimas pensare profusas,
Inferiasque sui Gnati deferre sepulcro.
Tigris ut effeta, atque olim satiata rapinis
Sola sedet, senio vires tardante; nec iras
Unguibus educit, qualeis prius. ast ubi clamor
In silvas ruit, et saevi reminiscitur hostis:
Pigros sese annos supplet, iuvenesque furore
Transilit, et plus quam tigridi licet, audet in armis.
Dire senex, superisque invise! quid ultima perdis,
Munera, quae extremum Cerealia rodere posses
Frustra in bella ruis vindex, et fata laboras
Corrigere: haec tantum fiunt meliora ferendo.
Dum furis et strides: vix horrida verba profari
Desieras: iam te calamo septemplice fusum
Explicat interdum, consurgens Borborocoetes ;
Et iubet, ut natum Genitor miserande sequaris:
Ac referas, quanti Ranarum proelia constent.
Moesta necis facies. non uno vulnere ruptum
Corpus procubuit, miserando more: iacentis
Semineces micuere pedes: tamen ora palude
Avertit, qua submersum Psicharpaga novit.
Hostis contemptum funus proiecit in undas:
Hanc bibe, dixit, aquam, quam filius. ille gravatus
Armis descendit auris fuit ultima visa.
Pergit ovans, additque alias pereuntibus umbras;
Pternoglyphum , quamquam obsessum durumque secari
Discluso thorace ferit. praetenta caducis
Missilibus lacerna crepat. nux plurima iactu
Decidit e galea, vertexque inglorius armis
Obstantum, mortique pater. tamen omnia cautus
Spicula (non semper cautus, dilataque mors est)
Vitavit, socium involvens. succiditur ense
Lichopinax , nam nulla fuga est. abdomine tardus
Deliciis farto, nequit evasisse sequenteis.
Dentibus excussis crepuerunt vulnere malae.
Lychomylen (crudele!) rapit Pelusius unco.
Moesta precabatur: sed quid suspiria rupi!
Quem lacrimae tales umquam movere tyrannum?
X. Aspirat fortuna, supraque pericula fertur
Qui magis est audax. ventum ad tentoria regis
Memnonii via vi tandem penetratur, ad imi
Carceris informeis cippos: ubi lurida turpi
Limnochatis squalore iacet, validaque catena
Stringitur. hanc salvam decussa compede tollit
Herbosum in clipeum felix Seutlaeus amore:
Et reliquis multum mandat sua gaudia nymphis .
Illa Lacum repetens, fatisque exercita belli,
Otia damnato Mavorte palustria praefert.
Arva rubent, et vix densatis sufficit agger
Funeribus. passim caedes, ululatus, et hastae,
Et iunci mediis rorantes ossibus exstant.
Saevus ubi, Rex increpitat Physignathus ingens,
Saevus ubi Mausolus , et atto Artmisia vultu
Penthesilea furens? ubi vani gloria fastus?
Dictaque prodigiis nostras aequantia Phocas?
Illepidi fungi, nec curis apta severis
Pectora. tunc celeres estis, cum mucida signum
Mappa dedit, patulasque afflat gravis amphora nares,
Telorumque vicem contorta tomacula supplent.
Infremuit Mausolus ad has cum Coniuge voces.
Illam adeo secum certa in discrimina ducit,
Certus et ipse necis: coniecta sustulit hasta
Prassaeum ; lateri Regis qui proximus haesit
Armiger. heu, frustra totiens laudatus in arcu
Et disco, glaucisque choro certante puellis.
Discissus medium. pars terrae affixa quievit:
Pars permissa Noto; pars stagno iniecta natavit.
Regis ad exemplum fortis, sed dispare casu
Troglodytes (noctu sciitus turbare cavernas,
Tunc acer miles, nec cuspide certior ullus)
Sudavit madidum prosternere Pileona .
Vim cohibet frater Pelusius ; et bene magnum
Sustulit e ripa saxum, limoque gravatum
Immanem torsit nixus post terga ruinam.
Labitur in terram, ceu toto oppressus Atlante
Mus trepidans, rigidosque pedes exporrigit arva.
Quid iuvat audacem bello vincente fuisse
Troglodyten ? quando tandem solertia forti
Defuit. incautus dum tela minatur et urget,
Sorex indicio se prodidit atque peremit.
Vis sine consilio non est diuturna, suaque
Mole ruit. totiens Ithaco Telamonius Aiax
Cesserit, et clipei rigidos septemplicis orbes
Substernat gladio, si quem libraverit astus.
Vera adeo paucos in bello Gloria ducit,
Aut sequitur. Sapiens iram moderatur, et intra
Mentis castra tenet. frustra sua bracchia iactat
Centimanus Briareus , caeco si nullus opaca
Sol a fronte micet, totidem qui dirigat enses.
XI. Mausolus super unus erat de pluribus: illum
Et sua Fata premunt, letique animosa cupido
Admonet; ut celebri funus memorabile fama
Includat. rapidas igitur movet undique turmas,
Quas desperatus coniungit, et ultimus horror
Mittit in auxilium. quot milia dissecat ore?
Quot Ranas umbone necat? quot casside sternit
Incurrens! Seutlaeum uno transverberat ictu,
Et super incumbens fatur: mihi praestrue fossam,
Atque Umbris memora, nostros mox affore maneis,
Lucraris mediam mortem, sensumque doloris.
Ecce cadis dextra minime, Seutlaee , pudenda.
Rex ferit, et caesum tristi caput immolat Orco :
Avulsitque caput cadit ille extrema secutus,
Et moriens frustra patrias se vertit ad undas.
Nil prodest, occise, tibi solvisse ligatam
Limnocharin : tamen illa tuos deflebit amores.
Te liquidae viridi lacrimantur in amne Napaeae :
Te Dea Leucothoe vitreis deplorat ocellis:
Te bulla lucente palus Maeotica plangit.
Nec tibi profuerat titulus regalis aquarum
Hydromedusa : nisi obliquatam concitus hastam
Fregisset, conviva tuae Pelusius aulae.
Ipse quoque Hypsiboas per tot discrimina rerum
Salvus adhuc, a rege perit: qui caecus in ira
Fervet, et extremum per strages quaerit honorem,
Exspectatque suos obitus. Mirabile! tellus
Panditur angustum Muris parvum que foramen
Fit barathrum, mundique aperit latebrosa nocentis:
Et paene ad Stygios patuit nova semita mancis.
Qualiter immensas post strages ruptaque claustra,
Cum spelunca ingens tremuit succussa fragore,
Amphiarae , tuos currus niger hausit Avernus :
Et non praevisus Parcarum fila notasti.
Sicut erat, clipeo gladioque instructus et ocreis
Mausolus , cedente subit tellure profundum
Absorptus, caelique sui descendit in antrum.
Longa acus infernas pupugit vicinior umbras.
Gleba coit. frustra quaerat vestigia casus
Miles, et attonitus timeat monstrata viator.
Et nunc ille locus magno terroris honore
Vitatur. propiusque cavent accedere Mures.
Fama est, huic ipsas tumulo decedere Feles,
XII. Glaucorum in castris latas Victoria pennas
Explicat, et festo clamore incenditur aer.
Ranae omnes mirante metu laetoque pavore
Insessae, tantis vix audent credere Fatis.
Qualis ubi occubuit stabulorum terror et hostis
Saepe lupus populatus oves, oviumque Magistros:
Gaudet ager, gaudent silvae; memoresque coloni
Damnorum, super arboribus se fronde coronant,
Et debellati furis de clade queruntur
Ipsi agni exsultant, et tondent laetius herbam
Securi. pacem viridis modulatur arundo.
Tali more fremunt Ranae, Divosque quieti
Aequoris extollunt caelo; Phorci que repexam
Canitiem, Phoebi que sui Genitoris et arcum
Et pharetram. veluti toto iam Marte peracto
Inclamant Paeana . movens Lacus omnis ab imo
Ebullit fundo. per stagna virentia duci
Credas caeruleis in curribus Amphitriten .