Age praepeti volatu,
Age, Fama, scinde nubes:
Famulantibusque nimbis
Zephyros citatiores
Meliore linque cursu,
Aquilonibus protervus
Ocior, et pigro surgentes aere ventos.
Age, diva, scinde nubes:
Et utramque vise partem,
Orientis et cadentis:
Via qua citata Solis
Celeres rotas fatigat,
Geminumque Phoebus axem
Circuit, aeternisque laboribus aethera lustrat.
Age, Fama, tende pennas,
Zephyros praei volantes.
Age, Fama, solve linguas.
Age, et ora pande centum
Merita loquacitate:
Tibi si patent tot ora,
Quot vigiles oculi, quot sunt in corpore plumae.
Age, Thracios furores,
Age, regios honores
Prohibe tubis silere;
Neque victa laus senecta,
Et inerte nube tecta
Scythici indices triumphi
Odrysias olim doleat marcescere lauros.
Age, garrulae canenda
Ita semper, et stupenda
Nova suppetant: nec unquam
Taciturnitas molesta
Tibi claudat ora moesta;
Oculosque curiosos
Sarmaticae semper virtutis imagine pascas.
Age, Bosphorum rubentem,
Age, Vistulam calentem
Scythico cruore narra.
Cane Tartaros fugaces,
Cane Sarmatas sequaces;
Celeresque dic Polonos
Crescentem Odrysio Lunam minuisse tyranno.