Le nocher tempesté de la brusque algarade
Du vent enfelonné à long cris murmurant
Par les flos escumeus à un astre esclairant
A la faveur duquel il se sauve à la rade.
Puisse i aller ainsi quant je seray malade
Dans le lit de la mort vers toy me retirant.
Et de bouche & de ceur ta taveur implorant
De ton objet divin assouvir mon œillade.
O JESUS mon Sauveur la seule vérité
Et la vie est en toy, & par l'obscurité
Ne marche point celuy qui chemine en ta voye.
Esclaire donc mon ame, & par le centre obscur
De ceste infirme chair monstres moy ta lueur
L'homme sans ton secours aisement se fourvoye.