Le navire est basti pour naviguer au port,
Et non pour s'arrester en une mesme place :
DIEU t'a fait pour surgir dans le haure de grace
Non pour vivre en plaisir courant à tout desbort
Le navire vogant flotte du Sus au Nort
Et ne laisse apres soy signe aucun de sa trace :
Nostre caduque vie en grand vitesse passe,
Et ne reste de nous memoire apres la mort :
A beaucoup de danger la navire est sujette,
Au combas, aus fracas, au vent, à la tempeste,
Aus ruses du coursaire, au peril du rocher
Mais la condition de ceste pauvre vie
De beaucoup plus de maus sans cesse est poursuivie,
Parant aus traistres cous du Diable & de la chair.