Solde ich iemer frowē leit·
ald̾ arg geſpꝛechen dc hat ſi v̾ſchuldet wol·
div dc hat von mir geſeit·
dc ich ſinge owe vō der ich iemer dienen ſol·
ſi iſt des liehten meien ſchin·
vn̄ min oſterlicher tac· ſwenne ich ſi an ſihe ſo lachet ir das herze min·
Min frowe iſt ſo genedig wol·
dc ſi mich noh tůt vō allen minē ſoꝛgē fri·
des bin ich fro reht als ich ſol·
ich wene niemā lebe d̾ in ſo ganzen froͤiden ſi·
wol ir húte vn̄ iem̾ me·
alſo ſpꝛich ich vn̄ wúnſche ir des dv́ mir hat benomē mit froͤidē gar min alt owe·
Swas ich ſinge ald ſwc ich ſage·
ſone wil ſi doch niht troͤſtē mich vil ſendē man·
des mv̊s ich ringē mit d̾ klage·
vn̄ mit d̾ not die ich ſelbe mir geſchaffet han·
ſo iſt ſis doch dú frowe min·
ich bīſ der ir dienen ſol vn̄ wúnſche ir des dc iemer ſelig mv̊ſſe ſin·