SJ iſt zallen eren ein wib wol erkant·
ſchoner geberde mit zv́hten gemeit·
ſo das ir lop in dem riche vmbegant·
als der mâne wol verre vber lant·
lúhtet des nahtes wol lieht vn̄ bꝛeit·
ſo dc ir ſchin al die welt vmbe vat·
als iſt mit gv̊te vmbevangen dú ſchone·
des man ir giht· ſi iſt aller wibe ein krone·
Dis lop beginnet vil frowē v̾ſman·
dc ich die mine fúr alle andꝛú wib·
han zeiner krone geſezet ſo ho·
vnde ich der deheine vs genomē han·
deſ iſt vil luter voꝛ valſche ir der lip·
ſmal wol ze mâſſe vil fier vn̄ fro·
des mv̊s ich in ir genadē beliben·
gebútet ſi ſo· min liebeſt voꝛ allen wiben·
Got laſſe mir vil lange lebē geſūt·
die ich an wiblicher ſtete noch ie vant·
ſit ſi min lip zeiner frǒwē erkoſ·
wol ir vil ſvͤſſer vil rot iſt ir d̾ mvnt·
ir zene wis ebene vil verre erkant·
dur die ich gar alle vnſtete v̾kos·
do man ſi lobte alſo reine vn̄ wiſe·
ſenfte vn̄ los· dar vmbe ich ſi noch pꝛiſe·
IR tvgent reine iſt der ſvnnē gelich·
die truͤben wolken tv̊nt liehte gevar·
ſwēne in den meigē ir ſchin iſt ſo klar·
des wirde ich fteter froͤide vil rich·
dc vberlúhtet ir lob alſo gar·
wib vn̄ frǒwē die beſten fúrwar·
die mā benenne in tútſchem lande·
verre oder nach ſo iſt ſi es dú bas erkande·