Ich wene nieman lebe der minen kvmber weine·
den ich eine trage·
es entů dú gůte die ich mit trúwen meine·
vernimt si mine klage·
we wie tv̊n ich so dc ich so herzekliche·
bin an si verdaht dc ich ein kúnigriche·
fúr ir minne niht ennemen wolde·
ob ich teilen vnd weln solde·
Swer mir des erban ob ich si minne tǒgen·
seht der súndet sich·
si won mir zallen ziten vor dien ǒgen·
vnd dvnket mich·
wie si ge zv̊ mir dvr ganze mvren·
ir trost vnd ir helfe lâssent mich niht truren·
swenne si wil so fúret si mich hinnen·
mit ir wissen hant hohe vber die zinnen·
Ich wene si ist ein venus here die ich da minne·
wan si kan so vil·
si benimt mir beide froͤide vnd al die sinne·
swenne so si wil·
so get si dort her zv̊ einem vensterlin·
Vnd siht mich an reht als der svnnen schin·
swanne ich si danne gerne wolde schǒwen·
ach so get si dort zv̊ andern frowen·
Do si mir alrerst ein hohgemvͤte sande·
in dc herze min·
des wc botte ir guͤte die ich wol erkande·
vnd ir liehter schin·
sach mich gvͤtlich an mit ir spilnden ǒgen·
lachen si began vs rotem mvnde tougen·
sa zehant enzvnte sich min wunne·
dc min mv̊t stet hohe sam dv́ svnne·
We wc rede ich ia ist min gelǒbe boͤse·
vnd ist wider got·
wan bitte ich in des dc er mich hinan loͤse·
es wc e min spot·
ich tv̊n sam der swal der singet swenne er stirbet·
wc ob mir min sanc dc lihte noch erwirbet·
swa man minen kvmber sagt zemere·
dc man mir erbvnne miner swere·