Es tůt vil we ſwer h̾zekliche minnet·
an ſo hoher ſtat da ſin dienſt gar verſmaht·
ſin tvmber wan vil lúzel darane gewinnet·
ſwer ſo vil geklaget dc ze herzen niht engat·
er iſt vil wiſe ſwer ſich ſo wol v̾ſinnet·
dc er dient da man ſin dienſt wol enpfat·
vn̄ ſich dar lat·
da man ſin genade hat·
Ich bedarf vil wol dc ich genade vinde·
wan ich hab ein wib ob der ſvnnē mir erkoꝛn·
deſt ein not die ich niem̾ vberwinde·
geſehe mich ane als ſi tet hie bi voꝛn·
ſi iſt mir lieb geweſt da her vō kinde·
wan ich wart dvr ſi vn̄ dvrh anders niht geboꝛn·
iſt ir dc zoꝛn·
das weis got ſo bin ich v̾loꝛn·
Wa iſt nv hin min liehter moꝛge ſt̾ne
we was hilfet mich dc min ſvnne iſt vf gegan·
ſi iſt mir zehoh vn̄ ǒch ein teil ze verre·
gegen mittem tage vn̄ wil da lange ſtan·
ich gelebte noh den lieben abent gerne·
dc ſi ſich her nider mir ze trôſtē wolte lan·
wand ich mih han·
gar v̾kapfet vf ir wan·