133.0985C|
Quamvis informi Terpsicore paucula versu
Luserit, ardet amor quo pluscula cara superstes
Expediat, famulumque Dei super aethera tollat.
Namque iteris longos explevit honeste meatus,
Optatamque diu Petri properavit in aulam,
Tripudians pandis callido sub pectore venis.
Praeterea Andreae germana diaulia sancti
Ingressus, dictu mirabile! poplite cosso ( sic ),
Ingentes animos labiis patefecit apertis.
En ego commissis veniam deposco piaclis,
Inquit et excelsi testor per sceptra Tonantis,
Solve meae precibus molimina tarda loquelae,
Si quid habes fidei, pie doctor, apostole Christi.
133.0985D| Haec mox explicuit, non serius edita sumpsit,
Ingenium fandi capiens pariterque legendi.
Anglicus indicio superest adhuc quoque clerus,
Divinas pangens Latiis sermonibus odas.
Ille vaporatis afflatus haustibus erga
Auctorata volans altaria, liba piarum
Fundere jure precum studio satagebat inormi.
Unde sibi praeceptorem lucratus ad unguem,
133.0986A| Bis didicit bini pia dogmata docte fluenti,
Ritus paschales, varium lunaeque recursum,
Ignarasque suis latiatim sane rubricas.
Nomen erat tanto Bonifacius huic pedagogo,
Profuit iste viro nimium, quem glorificandum
Sub sacris papae venerabilis abdidit alis,
Exponens longos animi ferventis agones.
Quique fidem cernens, dextram praetendit, et ipsum
Liberius lata perfudit blande charita ( sic ).
Fultus sic pretiis sanctorum ex artubus almis
Relliquiis, pernix reduces supra memorati
Convertit gressus cara ad habitacula patris.
Commode cuncta meat, Lugduni celsa subintrat.