Mystica sanctorum panduntur dogmata Patrum,
Pneumate sanctifico quae cecinere Deo,
Aeterno Patris Verbo, quo cuncta creantur
Occultis sinibus, ordine quaeque suis,
122.1228B| Fabrica quo mundi formis simul omnibus una 5
Surrexit, fuerat ut ratione sua.
Quae sine praecessit in Christo tempore facta,
Dum semper natus cuncta creata videt.
Quam super effertur sanctus ratione regentis
Spiritus, ut sacras vivificaret aquas.10
Angelicum numerum superorum castra tenentem
Constituit mundo, cetera quaeque vides
Quorum primaten hominem paradisus habebat,
Assimilem factum mente videre Deum.
Hanc homo praeclaram speciem complectere nolens 15
Corruit, et prolem traxit ad ima suam.
Sed ne tanta Dei penitus transiret imago,
Hanc speciem hominis coepit habere Deus.
Hinc natus mundo, passus sub lege malorum,
122.1228C| Morte sua mortem perdidit ipse meam.20
Quo sunt, quo vivunt, quo stant, quo cuncta moventur,
Ille Deus moritur, vivat ut ipse homo.
Ordine multiplici signatus Patribus olim
Mactatur legi, vatibus et canitur.
Hic fuerat aries speculo provisus ad aram,25
Dum typicus Isaach ducitur ad jugulum.
Festinans populus Aegypto hunc sumpserat agnum,
Sanguine conspergens limina nota domus.
Hic fons, virga, petra, caelestis fulgor obumbrans,
Serpens, et manna, nubs, via, panis, aqua:30
Talia saepe Dei jussu sub tempore facta
Aeternum Dominum significare suum.
Hacque impleta die sacro venerantur honore,
122.1228D| Ista dies tanta mystica facta tenet.
Hanc mundus prodit congaudens luce decora:35
Florigeros motus mittit in aethra suos,
Germina producens, florentes gramine fructus;
Nam Christus fructus dulcis ubique suis.
Surrexit Christus, nostra hinc pia corda resultant,
Alleluia Deo orbis ubique canit.40
Inclyte qui regum, te rex conservet in aevum,
Prospera concedat, hinc super astra vebat.
122.1229A| Qui sub honore sui humili cum corde canoros
Alternos statuis, psallis et ipse, choros.
Credimus, ista tibi servantur culmine caeli,45
Heres davidicus efficiere pius.
Προσευχῆς petimus votis et corde precamur,
Qui dedit hoc velle, det tibi posse Deus.
Βασιλέει Καρόλῳ ἡμῶν σὺ Χριστὲ Βοήθει,
Ὡς κληροῦσθαι χοροὺς δυνατὼς οὐρανίους.50