122.1235A|
Kyrrie, caeligenae cui pollet gratia formae,
Astrea Caesareo cui cingunt stemmata vultus,
Regum progenies, quos auxit Francia felix,
Orbis terrarum quos alta voce salutat,
Laudibus amplificat, veneratur, ditat, honorat,5
Undique concurrens pontum secat, eminet arva,
Salve, Christicolum vertex, gratissime regum,
Rex pie, devoti ne spernas donula servi.
Exiguum munus largo, sed fonte receptum
Christiferum Patrum, mysteria plurima tractans.10
Hoc opus in Graeco construxit Maximus abbas.
Egregius pastor, scripturis inclytus auctor,
122.1235B| Magni Gregorii perplanans dicta remota,
Sensibus humanis theoremata mente revolvens.
Nec non in multis Dionysius additur ipse 15
Ariopagites, ornat quem laudibus amplis,
Explanat, testemque vocat Patremque beatum,
Tangens symbolicas praeclaro lumine byblos,
Quem nos edidimus, Vobis poscentibus, olim.
Hac quoque de causa praefatus Maximus abbas 20
Editus est nuper, nostro sudante labore,
Effectuque pio Vestrum pia jussa sequentes,
Cursim transtulimus, quae multo tempore quaerunt,
Et doctos sensus, et purae mentis acumen.